《選戰》劇評，或香港人看香港電視是常識吧

　　四年來第一次返屋企睇電視追港劇，看了HKTV開台呼聲最高的《選戰》。由傍晚起，面書跟whatsapp已開始被洗版，不知道有多少人跟我一樣，重溫久違多年的「回家看電視」感覺？

　　自離開buddyland，有四年沒在家追看電視。（當然很大原因是下班已夜深，回家只能看重播的烈火雄心。）老實說，《選戰》的製作跟編劇仍未100%脫離TVB影子，例如分場設計、橋段、人物出場，（咁的確班底係來自TVB嘛，仲想點？）但見得到台前幕後的勇於嘗試跟用心，更重要的是，我在劇集裏看到「香港」。

　　開頭出字幕，用咗立法會張相做背景，好傻仔地有一秒激動。大佬呀！終於由TVB的平行時空返到2014年的香港，知道自己睇緊香港拍的劇！

　　利申：曾在buddyland待過，深深明白編劇們的處境。所認識的創作／製作人絕非不問世事不關心政治，也絕非不想創新，但處境的確有其限制。TVB的世界彷如一個經過消毒（或消音）的平行時空，不提政治／敏感議題，宣揚主流價值觀，親密／暴力場面不能太露骨，編劇甚至連吸煙的鏡頭也要儘量避免，因為理論上所有劇集都是「合家歡」，有小朋友會看，所以不能教壞細路。以前《大時代》丁蟹掟仔落街的劇情，現在一定出唔到街。（又，近年不拍靈異題材，因不能賣埠到馬來西亞跟內地，比起其他劇集賺少好多。）

　　但也因此失真。（還有，在TVB劇集的平行時空，人人都住千呎大屋，全世界得一間醫院，（其實係buddyland的走廊平台），人人間公司個lift口同停車場都一樣）

　　警告：以下有劇透

　　當看到葉晴（李心潔）在碼頭外拿著大聲公，會想起去年的碼頭工潮；等開票的一幕，會眼前一亮，覺得「嘩個景堅似選特首」（可還記得當年灣仔會展的689？曾到會展外示威的請舉手）；看到陸偉陶（曾偉權）拉著太太的手在記者會上講大話，會想起唐英年的「感情缺失」（佢個角色擺明來自唐唐，富二代背景同「廢柴」）；看到宋漫山（廖啟智）坐在辦公室內一臉陰沉，會想起民建聯，而且個景堅似新立法會。（佢個角色擺明係曾鈺成，老左派，受北京信任，仲要係立法會主席，而且係捧個廢柴做特首都唔揀佢）仲有建制派無敵海景的辦公室VS葉晴（李心潔）精心打扮但坐在在簡陋公屋單位內開記者會的對比。

　　這是一個在河蟹以外，（比較）真實的香港。

　　當然真實感也跟製作有關，張癸龍（王宗堯）、葉晴（李心潔）的家、振民黨的辦公室、選特首的點票處（這五分鐘的戲用了幾十萬！）都用實景，而且導演的拍攝手法也見用心，例如振民黨開會的一場由wide-shot再close-up宋漫山（廖啟智）；張癸龍（王宗堯）到葉晴（李心潔）家的一場，由左至右pan過去，好明顯計算過鏡頭位置，雖然略嫌斧鑿痕跡太深。

　　人物設計也有花過心機，宋漫山真係好啱智叔，佢啲眼神堅係陰沉到得人驚，他太太的一句「my pleasure」令人對二人關係有好多猜測；張癸龍（王宗堯）作為一個沉迷酒色、召妓、住大屋揸audi的有錢仔，投身政界偏又退居幕後，點解佢要做咁多嘢？佢想利用葉晴（李心潔）做乜？妻承夫業，葉晴（李心潔）的角色令人想起阿羅約夫人，但她的性格暫時未好出，希望之後有多啲發展。

　　唔小心click咗上官網偷睇人物介紹，遲啲智叔會同李心潔打選戰，仲有郭峰。好啦我認我有少少期待，哈哈。

　　好耐無咁樣睇電視法，雖然不無瑕疵，例如啲對白好似舞台劇，e.g.「係，當晚的確係發生咗一宗交通意外」，而且新演員演技較幼嫩，講對白感覺有啲似教育電視（但試新嘢係咁，誠意搭夠，相信觀眾不會太介意。）

　　另外，處女座性格發作，難免挑剔一下：作為前記者，會執著記者寫專訪點會用口語？好啦當係佢打返個transcript，但寫得太刻意，唔似呃到葉晴（李心潔）；碼頭CEO點解要老實同葉晴（李心潔）交待同振民黨的deal係乜？死因報告書29頁變成28頁，無咗一頁附件，但呢個世界上有softcopy的，無理由查唔到（係咪其實係伏筆，張癸龍（王宗堯）仲有隱瞞）？

　　唔小心寫咗咁多㖭，作為一個ＯＬ，聽日要返九點真係好痛苦。看得出《選戰》台前幕後的努力，（K.K.好波！）但同時也非常非常希望大家知道，buddyland亦不乏有心人，只是處境不同。

　　記得Ｎ年前採訪一位編劇前輩，她說，喜歡寫劇本，因為知道大家會坐在電視機前同哭同笑，人間有情，你並不孤單。據說今晚不惜用非法的ustream看轉播的也有18萬人，（我也是，開不到app），對上一次回家一起看電視，是什麼時候？