懶人寫的太陽花學運懶人包：香港版

（照片來自黑色島國青年陣線臉書，攝影：黃宏錡）

　　跟酒窩小姐聊電話，她說想了解台灣在發生什麼事，為什麼大學生要上街。

　　於是笑說，你好彩，識到我。

　　以下小小地整理一個香港版的「台灣反服貿懶人包」，給關心彼岸的朋友。製作粗糙，有錯千萬告知。歡迎share或remake，很希望很希望大家多關注。

        謝謝大家願意花時間了解這個世界在發生什麼事。今日香港，明日台灣。

1. 乜嘢係服貿？

• 兩岸服務貿易協議＝台灣版CEPA（即係2003年香港開放自由行嗰個CEPA）
• 台灣政府聲稱向內地開放64個大項目，其實細項有過千種服務業，由買廁紙到買棺材，包起你衣食住行生老病死。
• 但台灣蝕大綽，因為兩邊開放唔對等。例如內地公司去台灣可以獨資經營，唔限地點；但台商去內地要合資，股權唔可以多過50%，而且只開放福建、廣東，開放嘅行業都唔對等

2.點解台灣要反服貿？

• 既然「沙士後中央送厚禮 CEPA助港再起飛」( 2011年大公報報導)咁有ｓｏ，點解台灣死都唔願簽服貿？
• 嚟到呢度，要解釋吓，佢哋反對有兩個層次：
• 第一係反對服貿嘅內容
• 第二係反對政府簽服貿嘅過程黑箱作業

（網上圖片，來自日本網友創作）

3.點解反對服貿嘅內容？

• 香港人鍾意去台灣掃夜市，幫襯鋪頭仔，因為台灣99.7％都係中小企，一旦打開門放內地資金入嚟，上次你去台北食嗰間「up dup」街邊魯肉飯，點同內地嘅巨型國企爭？唔明嘅話，可以落樓下個領匯商場望下。
• 大家行過廣東道，應該知道地球上無嘢係內地大款們買唔起，例如台灣。全台灣銀行夾埋總值36.2兆台幣，但內地淨係計一間工商銀行已經值84.4兆台幣，阿爺要控制台灣金融、電訊網絡、傳媒、出版呢啲重要行業，易到喊。要用導彈統一兩岸好難，但錢阿爺大把，呢吓先堅大鑊呀！
• 明顯示範點樣用錢控制人嘅例子，係林宥嘉、五月天阿信（堅失望，stay real唔該改成stay rich）話撐學生，內地網民一話要封殺，即刻轉口風補鑊，可見內地市場嘅威力。

4. 點解話政府簽服貿嘅過程黑箱作業？

　　有圖有真相，以下係3月17日立法院通過服貿嘅會議紀錄，其實仲有一句趁亂翕嘅「（通過）送院會存查」，但打minutes嘅同事明顯好盡責形容當時情況：

Post by [我是學生，我反旺中] 反媒體巨獸青年聯盟.

• 其實舊年6月小馬哥已經簽咗服貿，但因為全台灣嘈到拆天，政府於是承諾，退還俾立法院逐條審議先通過，程序係立法院內政委員會-->立法院大會-->行政院。
• 但3月17日，立法院國民黨立委（類似我哋嘅立法會議員）張慶忠喺立法院內政委員會用隱藏咪暱埋喺角落頭（絕對係TVB處境喜劇橋段），趁亂宣佈通過服貿法案，直接上行政院。
• 班學生點解咁激動，係因為行政院好似香港立法會咁，過半數議席都係國民黨（建制派），所以一旦上左行政院，服貿必過無疑。
  
• 喂大佬，說好的逐條審議呢？

5. 咁台灣依加發生咩事？

• 其實學生由舊年七月起已經開始抗議
• 3月18日晚學生佔領立法院，一直留守
• 3月23日：學生攻佔行政院
• 3月24日凌晨：鎮暴警察用警棍、盾牌、水炮在行政院清場，立法院仍有學生留守。有學生被警察打到頭破血流。有相，有片，有我們。你和我都在見證，歷史會記住什麼人做過些什麼事。

(照片來自台灣網友臉書)

想知道更多，請google 反服貿懶人包，或看：

參考資料：
（推介）http://www.slideshare.net/showling/i-26155291
台大經濟系鄭秀玲教授，服貿自救寶典(I) : 服貿協議將對誰有影響

http://billy3321.github.io/tisa/
服貿懶人包

http://www.ettoday.net/news/20140324/338425.htm
駁「躲廁所30秒」過服貿　張慶忠：是綠不讓我開會

（推介）http://ahongkonger.weebly.com/
這十年，香港的變化